Jaamacadda Ummadda Soomaaliyeed iyadoo la kaashaneysa Jaamacadda Palermo (UniPA) iyo Hay’adda Talyaaniga ee Iskaashiga Horumarinta (AICS), ayaa si rasmi ah u daah-furtay mashruuca muhiimka ah ee PAIS-FUS – mashruuc saddex sano socon doona oo diiradda saaraya dhisidda iyo tayeynta kartida maamulka ee hay’adaha dowladda, iyadoo lagu bilaabayo Wasaaradaha Caafimaadka iyo Caddaaladda ee Dowladda Federaalka Soomaaliya.
Munaasabadda furitaanka mashruuca oo lagu qabtay RA Hotel ee magaalada Muqdisho ayaa waxaa ka soo qeyb galay madax sare oo ka tirsan dowladda, oo ay ka mid yihiin Wasiirka Caddaaladda, Wasiirka Caafimaadka, Wasiirka Waxbarashada iyo Tacliinta Sare, Wasiir-dowlaha Wasaaradda Caafimaadka, Safiirka Dowladda Talyaaniga ee Soomaaliya, Madaxa AICS, Wakiilka WHO ee Soomaaliya, Guddoomiyaha Jaamacadda Palermo, iyo khubaro kale, iyadoo ay goob joog ahaayeen macallimiin, aqoonyahanno iyo marti sharaf kale.
Raktarka Jaamacadda Ummadda Soomaaliyeed, Prof. Xasan Cusmaan Gacal, oo furitaanka munaasabadda ka hadlay, ayaa tilmaamay in mashruucan uu yahay tallaabo muhiim ah oo lagu horumarinayo hay’adaha dowliga ah. Wuxuu sheegay in PAIS-FUS uu fure u yahay in la helo saraakiil si qoto dheer ugu tababaran maamulka casriga ah, kuwaas oo gacan ka geysan doona hagaajinta adeegyada caafimaadka iyo caddaaladda ee dalka.
Mashruucan oo ay maalgelinayso Dowladda Talyaaniga ayaa waxaa si wadajir ah u hirgelinaya Jaamacadda Palermo iyo Jaamacadda Ummadda Soomaaliyeed, iyadoo casharrada iyo tababbarrada la siinayo saraakiisha dowladda ay bixin doonaan tababbarrayaal iyo macallimiin Soomaaliyeed oo si gaar ah loogu tababaray doorkaas.
Prof. Gacal ayaa si gaar ah u bogaadiyey macallimiinta Soomaaliyeed ee Jaamacadda Ummadda Jaamacadaha Dalka ee loo xushay inay hormuud ka noqdaan geeddi-socodka tababbarka, isagoo ku tilmaamay inay yihiin laf-dhabarka isbeddelka la rajeynayo. Wuxuu sidoo kale ammaan u jeediyay Jaamacadda Palermo iyo AICS sida ay mar kasta ugu garab taagan yihiin Soomaaliya, gaar ahaan dhanka dowlad-dhisidda iyo tayeynta adeegyada aasaasiga ah.
Wasiirka Caddaaladda iyo Dastuurka JFS, Mudane Xasan Macalin, ayaa sheegay in mashruucan uu yahay fursad dahabi ah oo shaqaalaha dowladda loogu diyaarinayo inay kaalin muuqata ka qaataan horumarinta dalka. Wuxuu carrabka ku adkeeyay in tababbarku ka dhici doono gudaha dalka, taasoo muujinaysa go’aanka dowladda ee ah in la dhiso aqoonta gudaha lana yareeyo ku tiirsanaanta dibadda.
Wasiirka Waxbarashada, Mudane Faarax Sheekh Cabdulqaadir, ayaa hoosta ka xariiqay in mashruuca uu si weyn uga qeyb qaadan doono horumarinta xarumaha caafimaadka iyo caddaaladda, iyo in fursado badan oo aqoon kororsi ah lagu soo kordhin doono sanad dugsiyeedka cusub. Wasiirku wuxuu bogaadiyay dadaalka labada jaamacadood – JUS iyo Palermo – isagoo sheegay in mashruucu uu noqon doono mid mug iyo saameyn weyn ku yeesha adeegyada dowladda ee shacabka.
Wasiirka Caafimaadka iyo Daryeelka Bulshada, Dr. Cali Xaaji Aadan, ayaa xusay in mashruuca PAIS-FUS uu wax weyn ka bedeli doono tayada adeegyada caafimaadka, wuxuuna si gaar ah uga mahadceliyay dowladda Talyaaniga taageerada ay siiso Soomaaliya. Wasiirku wuxuu tilmaamay in iskaashiga labada dal uu yahay mid taariikhi ah, isla markaana laga dhaxlay horumar muuqda oo gaaray xarumaha caafimaadka dalka.
Ugu dambeyn, Prof. Gacal oo soo xiray munaasabada ayaa ka qaybgalayaasha ku dhiirrigeliyay inay si dhab ah uga faa’iideystaan mashruuca, si tababbarradu aysan ugu ekaan hawl kooban, balse ay noqdaan kuwo horseeda isbeddel muuqda oo wax ku kordhiya qaabka ay u shaqeeyaan hay’adaha dowladda.
– DHAMMAAD –
Xafiiska Warfaafinta & Xiriirka
Jaamacadda Ummadda Soomaaliyeed
Email: media [at] www.universityofsomalia.net
Website: www.universityofsomalia.net
Twitter: @Somali.NU
Facebook: Jaamacadda Ummadda Soomaaliyeed